Ўзбекистоннинг соф олтин-валюта захиралари ҳажми бир ой ичида 220 млн долларга ошиб, 1 ноябрь ҳолатига кўра 25,71 млрд долларни ташкил этди, дея хабар қилди Ўзбекистон Марказий банки.
Октябрда ялпи олтин-валюта захиралари қарийб 100 млн долларга ошиб, 26,49 млрд доллардан зиёдроқни ташкил этди. Ундан хорижий валютадаги активлар ҳажми — 11,84 млрд доллар (бир йи ичида -610 млн доллар), монетар олтин — 14,65 млрд доллар (+700 млн доллар).
Марказий банк октябрда олтин-валюта захираларининг кўпайишини қисман олтин нархининг 1183,50 дан 1217,70 долл/тр унцияга ўсгани билан изоҳлади. Нархнинг олтин-валюта захираларининг кўпайишига таъсири — 403,2 млн долларни ташкил этди.
Мамлакатнинг соф олтин-валюта захиралари сўнгги бор апрель ойида ошган эди. Шундан сўнг у пасайиб борди. Марказий банк бу ҳолатни олтин нархларининг арзонлашгани билан изоҳлади. Январдан октябрга қадар олтин нархининг 1296,50 дан 1217,70 долл/тр унцияга қадар пасайди ва Ўзбекистоннинг олтин-валюта захираси 853 млн долларга камайди.
