19 ноябрь куни Ўзбекистон ташқи ишлар вазири Абдулазиз Камилов мамлакатда бўлиб турган «Ўзбекистон бўйича кокус» ҳамраислари Трент Келли ва Висенте Гонсализ бошчилигидаги АҚШ Конгресси Вакиллар палатаси аъзолари гуруҳи билан учрашди. Бу ҳақда Ўзбекистон ТИВ матбуот хизмати хабар қилди.
Делегация таркибидан Вакиллар палатаси муҳим қўмиталарининг республикачи ва демократ аъзолари ўрин олган.
Вазир, аввало, конгрессменларни яқинда бўлиб ўтган оралиқ сайловларда қайта сайланганлари билан табриклади ва АҚШ Конгрессининг қуйи палатасида икки томонлама муносабатлар тарихида илк бор «Ўзбекистон бўйича кокус"нинг тузилганлигини эътироф этди.
Бўлиб ўтган суҳбатда президент Шавкат Мирзиёевнинг май ойидаги АҚШга расмий ташрифи ва унинг Президент Доналд Трамп билан олиб борган сермаҳсул музокаралари натижасида кенг қамровлик ва жадаллик касб этаётган Ўзбекистон-Америка кун тартибининг долзарб масалалари муҳокама қилинди.
Учрашувда ўзбекистонлик ва америкалик парламентарийлар ўртасидаги алоқаларни кенгайтириш, Ўзбекистон ва АҚШ ўртасидаги изчил ривожланаётган ҳамкорликнинг ижобий жараёнларни қонуний мустаҳкамлаш истиқболлари кўриб чиқилди.
Мамлакат президенти Шавкат Мирзиёевнинг май ойида Америка Қўшма Штатларига қилган ташрифидан сўнг «Ўзбекистон бўйича кокус» тузиш ва унинг таркибига етакчи конгрессменларни бирлаштиришда эришилди. Вашингтонда Ўзбекистон раҳбари янги тузилмага бошчилик қилиш ва унинг фаолиятига Вакиллар палатасининг бошқа етакчи аъзоларини жалб қилишга тайёрлигини билдирган Миссисипи штатидан конгрессмен Трент Келли бошчилигидаги Конгресс аъзолари гуруҳи билан учрашган эди. Кокусга яна бир етакчи қонун чиқарувчи — техаслик Висенте Гонсализ ҳамраис бўлди.
Август ойи охирида АҚШ Конгресси маъмурияти Вакиллар палатасида «Ўзбекистон бўйича кокус"ни расман рўйхатга олди. Кокус амалиётига мувофиқ, бир йилда икки марта Америка-Ўзбекистон ўртасидаги ҳамкорликни ривожлантириш йўллари муҳокама қилинади. Биринчи учрашув январь ойи бошида бўлиб ўтади. Ўзбекистонга ташриф АҚШ Конгресси аъзоларининг мамлакат ҳақида хабардорлигини ошириш мақсадида ташкил этилган.
