Ўзбекистон ва Қозоғистон Ипак йўли мамлакатлари виза режимларини ўзаро тан олиш тўғрисидаги битимни имзолади, дея хабар қилди Қозоғистон бош вазири матбуот хизмати.
Қозоқ ОАВларининг қайд этишича, бу Қозоғистонга ташриф буюрган сайёҳ ҳеч қандай тўсиқларсиз Ўзбекистонга ташриф буюриши мумкин ва аксинча. Истиқболда ўзаро виза алмашинувига Ипак йўлининг бошқа мамлакатлари — Қирғизистон ва Тожикистон ҳам қўшилиши мумкин.
Ушбу ва яна 15 ҳужжат биринчи Қозоғистон-Ўзбекистон Ҳудудлараро форумида имзоланди. Томонлар KTZ Express компанияси ва «Ўзавтотранстехника» Илмий-ишлаб чиқариш маркази ўртасида қўшма корхона ташкил этиш тўғрисидаги шартнома имзоланди. «КазТрансГаз» ва «Ўзтрансгаз» компаниялари Ўзбекистон ҳудудида орқали табиий газ транспортировкаси бўйича келишувга эришди.
Икки давлат раҳбарлари ташаббуси билан ташкил этилаётган форум ишида ҳудудлар раҳбарлари, Ўзбекистон ва Қозоғистон бош вазирларининг биринчи ўринбосарлари Очилбой Раматов ва Аскар Мамин иштирок этди.
Тадбирда қайд этилганидек, икки республика ўртасидаги савдо айланмаси тўққиз ой ичида 2 млрд доллардан зиёдроқни ташкил этди ва ўтган йилнинг шу даврига нисбатан 40 фоизга ўсди.
