Фарғонада Фарғона шаҳар ИИБ 2-сонли ички ишлар бўлими профилактика инспектори лавозимида ишлаган ва 400 минг сўм пора билан қўлга тушган Элёр Юлдашевга нисбатан суд ҳукми ўқилди. Бу ҳақда ЎзА хабар қилди.
Ички ишлар ходимларини юртимиз тинчлиги ва осойишталигини сақлашдаги хизмати беқиёс. Афсуски, улар орасида ҳам ўз бурчини унутганлар ҳам учраб турибди. Элёр Юлдашев Фарғона шаҳар ИИБ 2-сонли ички ишлар бўлими профилактика инспектори лавозимида ишлаб келаётган эди.
У хизмат олиб бораётган ҳудудида яшовчи фуқароларни маъмурий тартибда қамоққа олиш билан қўрқитиб, тамаъгирлик қилган. Шу билан бирга аҳолидан тушаётган ариза ва мурожаатларни турли баҳоналар билан рад қилиб, ўз вақтида қайд этмасдан, улар бўйича зарур чора-тадбирларни амалга оширмаган.
10 май куни фуқаро Г. Онинг аризаси асосида Бош прокуратура ҳузуридаги Иқтисодий жиноятларга қарши курашиш департаментининг Фарғона шаҳар бўлими ва вилоят ИИБ ходимлари ҳамкорлигида ўтказилган тадбирда аризачидан 400 минг сўм пулни пора тариқасида олаётганда қўлга олинди.
Олиб борилган тергов суриштирув жараёнларида Э.Юлдашев аризачидан жорий йилнинг 2 май куни ҳам 200 АҚШ доллари пора олганлиги, у жиноий ҳаракатларини маҳалла посбони орқали амалга оширилгани аниқланди.
Жиноят ишлари бўйича Фарғона шаҳар суди Э.Юлдашевнинг қилмишига яраша жазо тайинлади.
