Наманган вилояти ҳокимлиги матбуот хизматининг хабар беришича, ҳамкорлик доирасида вилоятда 4 та — Наманган «IT» технопарки, Наманган текстилтехнопарки, Чортоқ агро ва косметика технопарки, Косонсой тиббиёт технопарки ташкил этиладиган бўлди.

Шунингдек, вилоятда технопаркларнинг ташкил этилиши билан аҳолини бизнес бўйича қизиқишлари ва билимларини ошириш, ҳар бир туманда инновацион бизнес марказлари ташкил этиш ва замонавий бизнес ташкил қилишга ўргатиш йўлга қўйилади. Бу билан Наманган вилоятидаги олий ўқув юртлари билан технопарклар, профессор ва тадқиқотчилар ўртасида ҳамкорлик ришталари боғланади.

Чортоқ туманида уруғчилик ва кўчатчиликка ихтисослашган агро технопарк ташкил этиш бўйича Кёнбук технопарки ва Чонбук технопарки билан алоқа боғланди. Ташрифнинг яна бир натижаси сифатида Корея иссиқхоналари билан танишилгани бўлди. Чортоқда қулупнай етиштирмоқчи бўлган инвестор 200 гектардан зиёд қулупнай иссиқхонасига эга ва тадбиркорнинг алоҳида кўчатчилик лабораторияси ҳам бор. Инвестор билан қулупнай, қовун, тарвуз ва бошқа сабзавотлар кўчатчилиги учун лаборатория ташкил этишга келишилди. Юртимизнинг табиий иқлим шароити, тупроғининг унумдорлиги каттадан-катта имкониятларини юзага чиқара олади. Тиббиёт ва косметика борасидаги ҳамкорлик ҳам соҳа ривожига хизмат қилади.

Шу йилнинг июль ойида Корея Республикаси технопарклари уюшмаси вакилларининг Ўзбекистонга ташрифи чоғида қатор шартлашувлар имзоланган эди. 21−26 октябрь кунлари Жанубий Кореянинг Тегу шаҳрида нишонланган Корея технопаркларининг 20 йиллиги халқаро конференцияси ана шу шартлашувларнинг мантиқий давоми бўлди. Улкан аҳамият касб этган нуфузли халқаро тадбирда дунёнинг кўплаб мамлакатларидан, шунингдек, Корея модели асосида технопарклар ташкил этган Тайван, Индонезия, Вьетнам, Эфиопиядан ҳам меҳмонлар қатнашдилар.

Таъкидлаш лозимки, Корея технопарклари уюшмаси билан ҳамкорлик тўғрисидаги ҳужжат маҳаллий бозорда ахборот-коммуникация технологиялари ва экотизимлар стартапини ривожлантириш соҳасида узоқ муддатли стратегик ҳамкорликни амалга ошириш бўйича тарафларнинг ўзаро режаларини акс эттиради. Кореялик ҳамкорларнинг технологик тажрибаси ғояларни юзага келтирадиган, уларни ишлайдиган, ташқи бозорда рақобатбардош маҳсулотларга айлантирадиган майдонча ва Ўзбекистонда стартапларни ривожлантириш учун пойдевор бўладиган «IT» — инфратузилмасининг универсал объектини яратишга имкон беради. Технопарк тузилмасида тадқиқот лабораториялар, «R&D» — марказлар, коворкинг марказлари ҳамда инновацион экотизимнинг бошқа таркибий қисмлари бўлиши назарда тутилган.