Наманган хизмат кўрсатиш касб-ҳунар коллежи ўқитувчиси дарсга келмаган ўқувчиларни ҳақоратлаб, калтаклади, дея хабар қилди Sevimli Tv. Ҳодиса тасвирланган видеоёзув интернетда пайдо бўлди.
Таълим муассасаси педагогининг сўзларига кўра, ўқувчилар тез-тез дарс қолдирган. «Кўп болаларнинг хулқи ёмон. Яхши гапириб кўрдик, тартибга чақирдик, натижада… тартибга чақириш учун шундай чоралар қўллагандир. Албатта, урмаслик керак», — деди коллеж директори ўринбосари Баҳодир Эргашев.
Ўқувчиларни урган Рашид Сафаров улар ўша куни дарсга кечикканини, иккинчи жуфтликдан кейин эса қочиб кетишганини сўзлаб берди. «Ўқувчилар жуда кўп дарс қолдиради, қочишади, биринчи жуфтлик дарсларига келмайди. [Ўша куни] улар девордан ошиб ўтиб, газ қувурига зарар етказишди. Мен уларни тўғри йўлга йўлламоқчи, тартибга чақирмоқчи бўлдим. Ҳиссиётга берилиб, ортиқча гапириб юбордим», — дея тушунтирди у.
Ўқувчилар телеканалга берган интервьюда ўз хатоларини тан олди ва ўқитувчи ҳақ эканини таъкидлашди. Ўқитувчи Рашид Сафаровга нисбатан чора кўрилди.
