29−31 октябрь кунлари Тошкентда Ўзбекистон нефть ва газ саноатида GTL (газдан суюқлик) лойиҳаси бўйича кредиторлар йиғилиши бўлиб ўтди.
Унда иштирок этиш учун Корея экспорт-импорт банки, Корея савдо ва суғурта корпорацияси, «Газпром» акциядорлик жамияти, «Росэксимбанк» акциядорлик жамияти ҳамда Экспорт кредитлари ва инвестицияларни суғурталаш бўйича Россия агентлиги вакилларидан иборат кредиторлар делегацияси Тошкентга ташриф буюрди.
«Давлатимиз ҳукумати GTL лойиҳасининг якуний молиялаштириш тузилмасини маъқуллади ва жорий йилнинг ноябрь ойи охирига қадар барча молиялаштириш масалаларини мувофиқлаштиришни якунлаш ва кредитларни жалб қилишни бошлаш вазифасини қўйди. Умид қиламанки, мазкур учрашув иштирокчиларга бу вазифани бажариш имконини беради», — деди «Ўзбекнефтгаз» акциядорлик жамияти бошқарув раисининг биринчи ўринбосари Улуғбек Сайидов очиб берар экан. Унинг фикрича, жаҳон нефть нархларининг ўсиш томон суръатлари GTL лойиҳасининг жозибадорлигини янада оширмоқда.
2017 йилнинг бошида «Ўзбекнефтгаз"нинг юз фоизлик шўъба корхонаси Uzbekistan GTL Қашқадарё вилоятида қиймати 3,7 млрд доллар бўлган синтетик ёнилғи ишлаб чиқарувчи завод қурилишига киришган эди. У йилига 3,6 млрд куб метр газни қайта ишлаб, 743,5 минг тонна дизель ёқилғиси, 311 минг тонна авиакеросин, 431,1 минг тонна нафт ва 20,9 минг тонна суюлтирилган газ ишлаб чиқаради.
Завод қурилишининг технологик қисми билан Жанубий Кореянинг Hyundai Engineering&Construction компанияси шуғулланади, маҳсулотлар лицензияловчиси эса — Жанубий Африканинг Sasol компанияси. Даниянинг Haldor Topsoe ишлаб чиқариш технологияларини етказиб беради. Лойиҳа тўрт йил давомида амалга оширилади.
