Россиялик тадбиркор, USM Holdings асосчиси Алишер Усмонов Mail.Ru Group`даги улушини холдинг бош директори Борис Добродеев бошқарувига топширди. Бу у компания устидан назоратни йўқотганини англатади, дея хабар қилди BBC рус хизмати.
Ҳозирга қадар USM «ТФ Технологии» акционерлик жамияти орқали Mail.Ru Group`ни назорат қилиб келаётган эди.
22 октябрь куни Борис Добродеев Mail.Ru Group директорлар кенгаши таркибига кирди ҳамда UMS ва «Мегафон"га тегишли «МФ Технологии» акцияларига бириктирилган овоз бериш ҳуқуқини қўлга киритди.
Борис Добродеев билан биргаликда Mail.Ru Group директорлари таркибига унинг биринчи ўринбосари Дмитрий Сергеев, «Газпромбанк» бошқаруви раиси ўринбосари Алан Ваксман ва «Газпромбанк» вице-президенти Сергей Меднов ҳам жой олди. Улар Сергей Солдатников, Иван Стрешинский, Анна Серебряникова ва Влад Вольфсон ўрнини эгаллади. Mail.Ru Group директорлар кенгаши раиси Дмитрий Гришин лавозимида қолди.
Алишер Усмоновнинг сўзларига кўра, у назоратни топширишга бир неча йил тайёргарлик кўрди ва бошқарувдан «енгил қалб» билан кетди. Mail.Ru Group вакилининг аниқлик киритишича, тадбиркорнинг қарори уни тарк этишини англатади. Алишер Усмонов тузилмалари эндиликда Mail.Ru Group`ни бошқармайди.
Mail.Ru Group шу номдаги почта хизмати, «ВКонтакте» ва «Одноклассники» ижтимоий тармоқлари, ICQ, Агент Mail.Ru ва ТамТам мессенжерлари ҳамда Warface, Skyforge ва Perfect World онлайн-ўйинларига эгалик қилади.
