Хаджизадаев Шерзод Рафатович Тошкент ҳокимининг иқтисодиёт ва тадбиркорлик масалалари бўйича биринчи ўринбосари лавозимига тайинланди. Бу ҳақда бош вазир Абдулла Арипов бошчилигида бўлиб ўтган йиғилишда маълум бўлди.
Тайинловга қадар Шерзод Хаджизадаев (1973 й. т.) Марказий банк раиси ўринбосари лавозимида ишлаган. 1996 йилда Тошкент давлат университетини, 2001 йилда Ўзбекистон Банк-молия академиясини тамомлаган. Банк тизимидаги меҳнат фаолиятини 1996 йилда Ташқи иқтисодий фаолият миллий банкида оддий мутахассисликдан бошлаб, бўлим бошлиғи лавозимигача кўтарилган. «Асака» банки бошқаруви раиси ўринбосари, Марказий банкнинг Тошкент бош бошқармаси бошлиғи, «Трастбанк» хусусий акционерлик тижорат банки бошқаруви раиси лавозимларида ишлаган.
Унгача мазкур лавозимда жорий йил май ойидан буён Қаҳрамон Турсунович Арипов фаолият кўрсатиб келаётган эди.
Фото: facebook.com/pg/chilonzorhokimligi
Хидоятов Даврон Абдулпаттахович (1976 й. т.) Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари лавозимига тайинланди. Мазкур лавозим президентнинг 17 августдаги «Тошкент шаҳрида бошқарувнинг алоҳида тартибини жорий этиш бўйича ҳуқуқий эксперимент тўғрисида"ги фармони асосида жорий этилган.
Тошкент давлат иқтисодиёт университети (1998 йил) ва Ўзбекистон банк-молия академияси (2001) битирувчиси. 1996−2004 йилларда Ўзбекистон Марказий банки тизимида, 2004−2005 йилларда «Осиё-Инвест Банк» (Москва) бошқаруви раиси лавозимида ишлаган. 2009 йилдан 2012 йилгача GM Uzbekistan компаниясининг молия бўйича ижрочи директори, 2012 йилдан 2014 йилгача MAN Auto-Uzbekistan ҚК бош директори лавозимларида хизмат қилган.
2017 йил апрелидан бугунги кунга қадар Чилонзор туман ҳокими в. б. лавозимида фаолият кўрсатиб келаётган эди.
Йиғилиш доирасида Иногамов Хаёт Илясович (1986 й. т.) Тошкент ҳокими ўринбосари — Каналлардан фойдаланиш ва уларга туташ ҳудудларни ободонлаштириш бошқармаси бошлиғи лавозимига тайинланди.
Бунга қадар Хаёт Иногамов Ўзбекистон Вазирлар Маҳкамаси ҳузуридаги «Tashkent City» халқаро ишбилармонлик маркази Дирекцияси давлат унитар корхонаси директорининг биринчи ўринбосари лавозимида ишлаган. 2008 йилда Тошкент автомобил ва йўллар институтини тамомлаган.
