Халқ депутатлари Наманган вилояти кенгаши депутати, Ўзбекистон либерал демократик партияси аъзоси Олимжон Тўхтаназаров пора олаётганда ушланди, дея хабар қилди Бош прокуратура «Газета.uz"га.
20 сентябрь куни фуқаро И. М. ҳуқуқни муҳофаза қилиш органларига мурожаат қилиб, Наманган вилояти Поп туманида мактаб директори бўлиб ишлагани, 2017 йил 14 ноябрда судланиб, вазифасидан озод этилганини кўрсатиб ўтади.
Аёл суд қароридан норози бўлади ва 3 сентябрь куни Олимжон Тўхтаназаровга мурожаат қилади. У 500 доллар эвазига юқори лавозимларда ишловчи танишлари орқали муаммони ҳал қилишга ваъда беради. И. М. бу ҳақда ҳуқуқни муҳофаза қилиш органларига хабар беради, дея қайд этди Бош прокуратура.
Наманган вилоят ҳуқуқни муҳофаза қилиш органларининг ҳамкорликдаги тезкор тадбирида 22 сентябрь куни тахминан 15:00 да Олимжон Тўхтаназаров И. М. дан 500 доллар олаётганда ушланди.
Мазкур ҳолат юзасидан О.Тўхтаназаровга нисбатан Ўзбекистон Жиноят кодексининг 168-моддаси 3-қисми «в» банди, 28, 211-моддаси 1-қисми билан жиноят иши қўзғатилди. Депутат вилоят халқ депутатлари Кенгаши розилиги олинган ҳолда Жиноят-процессуал кодексининг 221-моддаси тартибида ушланди.
