Туркиянинг DAL Teknik Makina компанияси Жиззах цемент заводида тозалаш фильтрлари ишдан чиққани учун жавобгарликни рад этди, дея хабар қилди компания вакили «Газета.uz"га.

Завод директори Исматулла Абдуллаев жума куни зарарли моддаларнинг чиқарилиши тозалаш қурилмаларининг барвақт ишдан чиққани сабабли юзага келганини маълум қилган эди. Аввалроқ эса Жиззах вилоятида аҳоли апрель ойидан буён заводдан оҳак кукуни ва чанг ҳавога чиқарилишидан шикоят қилган эди.

Унинг сўзларига кўра, қурилма учун шохобча фильтрлари 2017 йилнинг март ойида Туркия компанияси томонидан етказиб берилган ва икки йил ишлаши лозим эди, бироқ бу муддатнинг ярмидан кўпроғи давомида хизмат қилди холос.

DAL Teknik Makina компанияси 2017 йил 25 январда Олмалиқ кон-металлургия комбинати ва Туркия компанияси ўртасида имзоланган № 26−24638−236юр шартноманинг 2.3- бандидан иқтибос келтириб, фильтрларнинг кафолатли муддати улар етказиб берилган вақтдан сақлаш ва эксплуатация қоидаларига риоя этилган шароитда 12 ойни ташкил этишини маълум қилди.

«Сизга шуни маълум қиламизки, Европа стандартидаги сарф материаллари 12 ойлик кафолат муддати давомида тўлиқ ўз вазифасини бажарди. Шунингдек, бизнинг компаниямиз содир бўлган воқеалар учун жавобгар эмаслигини алоҳида таъкидлашни истаймиз», — деди у.

Компаниядан аниқлик киритилишича, ОКМК шикастланганларининг ўрнига ўрнатилган 2000 та фильтр учун тўловларни амалга оширган, яна 1850 донаси эса DAL Teknik Makina ҳисобидан етказиб берилган.