Жорий йилнинг 25 сентябрь куни Саудия Арабистоннинг «Al Hidaya Global Company LTD» компанияси бошқарув кенгаши вакили Салеҳа Баҳвини бошчилигидаги делегация Сирдарё вилоятига ташриф буюрди. Делегация аъзоларини вилоят ҳокими Ғ.Мирзаев кутиб олди. Бу ҳақда вилоят ҳокимлиги матбуот хизмати хабар берди.
Ташрифдан кўзланган асосий мақсад бугунги кунда Сирдарё вилоятида хорижий инвесторлар учун яратилган шарт-шароитлар билан яқиндан танишиш, шунингдек, балиқчилик ва йирик чорвачилик комплекслари, ишлаб чиқариш цехи ҳамда хорижий сайёҳлар учун ихтисослашган ёввойи ҳайвонларни етиштирувчи мажмуа ва бошқа тегишли инфраструктура қурилмаларини ишлаб чиқариш бўйича янги инвестиция лойиҳаларини амалга оширишни муҳокама қилишдан иборатдир.
Жаноб Салеҳа Баҳвини лойиҳанинг умумий қиймати 150 млн. АҚШ доллари эканлиги ҳамда уни амалга ошириш учун вилоят ҳудудидан 2500 гектар ер майдони зарурлигини таъкидлаб ўтди.
Музокарадан сўнг, делегация аъзолари вилоятнинг диққатга сазовор жойларини ҳамда амалга оширилиши кўзда тутилаётган лойиҳа учун ажратилиши режалаштирилаётган ҳудудни кўздан кечиришди.
