«Тошкент-Аэро» ихтисослаштирилган божхона комплекси ходимлари томонидан пойтахт аэропортида бир қатор божхона қоидабузарликлари фош қилинди. Бу ҳақда Давлат божхона қўмитаси матбуот хизмати хабар берди.

Жумладан, Бокуга парвози олдидан фуқар Т.У.нинг безовталаниши бежиз эмас экан. Шахсий кўрикдан ўтказилганда ушбу шахс оёғидаги пайпоғи ичига 1280 АҚШ долларини яширган ҳолда олиб чиқиб кетмоқчи бўлганлиги аниқланди.

«Нью Йорк — Тошкент» рейси бўйича парвозини якунлаган фуқаро Д.Х.эса божсиз олиб кириш меъёрларига зид равишда, рухсат этилган 2 литр ҳажмда эмас, балки қиймати 2,4 млн. сўмдан ортиқ 7,25 литр ҳажмдаги 7 шиша алкоголли ичимликларни олиб кираётган пайтида тўхтатиб қолинди.

Шунингдек, Ислом Каримов номидаги Тошкент халқаро аэропорти божхоначилари «Тошкент-Остона» рейси йўловчилари орасидаги нумизматика «ишқибози"ни «кашф» қилишди.

Фуқаро О.А. божхона назоратидан ўтиши вақтида унга тегишли бўлган сумкаси божхона кўригидан ўтказилганда, унинг ичида божхона назоратига тақдим этилмаган ва божхона ходимининг оғзаки сўровида айтилмаган, олиб чиқилиши тақиқланган, жами 25 дона тарихий аҳамият касб этувчи тангалар борлиги аниқланди.

Ҳозирда ушбу ҳолатлар юзасидан текширув ҳаракатлари олиб борилмоқда.