АҚШнинг халқаро диний эркинлик масалалари бўйича элчиси Сэм Браунбек 17−19 сентябрь кунлари Ўзбекистонга ташриф буюради, дея хабар қилди АҚШ Давлат департаменти матбуот хизмати.
У «диний эркинлик соҳасидаги сиёсат борасидаги ижобий қадамлар"ни муҳокама қилиш учун ҳукуматнинг юқори лавозимли вакиллари билан учрашади.
Бундан ташқари, Ўзбекистоннинг дин ва эътиқод эркинлиги соҳасидаги халқаро мажбуриятларининг бажарилишини кафолатловчи қонунчиликдаги ислоҳотлар кўриб чиқилади.
АҚШ элчиси Памела Спратленнинг Twitter орқали маълум қилишича, бу АҚШнинг эътиқод эркинлиги масалалари билан шуғулланувчи юқори лавозимли амалдорининг сўнгги ўн йилликдаги илк ташрифи ҳисобланади.
Сэм Браунбэк Тошкентга ЕХҲТнинг инсон ҳуқуқлари масалаларини кўриб чиқувчи йирик минтақавий анжумани — инсоний ўлчовлар соҳасидаги мажбуриятларнинг бажарилишини кўриб чиқиш бўйича йиллик Йиғилиши бўлиб ўтаётган Польшадан етиб келади.
