Индонезиянинг Жакарта ва Палембанг шаҳарларида Осиё ўйинлари якунига етиб бормоқда. Бокс бўйича Ўзбекистон терма жамоаси аъзолари Осиё ўйинларида 5 та олтин, 2 та кумуш медали соҳиби бўлди. Бу ҳақда МОҚ матбуот хизмати хабар берди.

Ҳасанбой Дўсматов ҳиндистонлик рақибига мағлуб бўлди ва Осиё ўйинларининг кумуш медали соҳибига айланди.

Жасурбек Латипов финалда филиппинлик Роген Ладонга қарши жанг қилди. Беллашувнинг иккинчи раундида филиппинлик боксчининг жароҳати сабаб ҳакамлар жангни тўхтатишди. Латипов очколар ҳисобига кўра Осиё ўйинлари ғолибига айланди.

Миразиз Мирзахалилов финалда Шимолий Корея вакили Хё Нам Жга қарши жанг қилди ва олтин медаль соҳибига айланди.

Шунқор Абдурасулов ҳал қилувчи жангда мўғулистонлик Тсендбаатар Ерденебатга қарши рингга чиқди ва кумуш медалга эга чиқди.

Боксчимиз Иқболжон Холдоров финалда мўғулистонлик Чинзориг Баатарсухга қарши жанг ўтказди ва ғалаба қозонди.

Бобоусмон Ботуров финалда Қозоғистон терма жамоаси аъзоси Алимбек Шимбергеновга қарши жанг қилди ва ишончли ғалабага эришди.

Исроил Мадримов финалда қозоғистонлик Абилхан Аманқулга қарши жанг ўтказди ва ғалаба қозонди.