Ўрганишлар мобайнида Республика бўйича 823489 нафар ишсиз ёшлар аниқланиб, уларнинг 574032 нафари бандлик масаласида мурожаат қилган. 400867 нафари тадбиркорлик фаолиятини бошлаш учун кредит сўраган бўлса, 67459 нафар ёш ўз бизнес лойиҳаларини йўлга қўйиш учун жой масаласида юзланган. Бу ҳақда «Ёшлар — келажагимиз» жамғармаси ижрочи директори Бунёдбек Баҳромбеков Ёшлар иттифоқи Марказий кенгашида бўлиб ўтган матбуот анжуманида маълум қилди.
Ишсиз ёшларнинг 209544 нафари касб-ҳунар ўрганиш, бепул курсларда ўқиш истагини билдирди. Мавжуд муаммоларнинг ижобий ҳал этилишида ички имкониятлардан келиб чиққан ҳолда Тошкент вилояти Қуйичирчиқ тумани ва Тошкент шаҳри Чилонзор туманидаги тажрибаларга таянилди.
Жумладан, тадбиркорлик соҳасига кирб келаётган 13261 нафар ёшлар мазкур соҳа билан яқиндан таништирилиб, бизнес-режалар тузиб берилди. 27381 нафари иш билан таъминланди. 6893 нафар ёшлар касб-ҳунар ўрганмоқда.
53975 нафар вояга етмаганлар ва ёшлар турли йўналишдаги тўгаракларга жалб этилди. Шунингдек, 3696 нафар ёшлар тадбиркор сифатида рўйхатдан ўтказилди. Бундан ташқари, 146 нафар ёшларга фаолият кўрсатиш учун бино билан таъминланиб, 3032 нафари касаначиликка жалб этилди.
Шунингдек, «Ёшлар — келажагимиз» жамғармаси ва «Халқ» банки, «Ипак йўли» банки, «Миллий» банки ҳамда «Ҳамкорбанк» акциядорлик тижорат банки ўртасида бош келишув имзоланди.
