Эртага Индонезия пойтахти Жакарта шаҳрида XVIII Осиё ўйинлари расман старт олади. Шу кунгача Ўзбекистондан футбол, от спорти, теннис, пенчак силат, академик эшкак эшиш, слаломда эшкак эшиш, бокс, қиличбозлик, енгил атлетика бўйича терма жамоалар Индонезияга етиб борган эди. Бу ҳақда МОҚ матбуот хизмати хабар берди.
Бугун Ўзбекистон делегациясининг катта қисми, жумладан, таэквондо WTF, ушу, сузиш, эркин ва юнон-рум кураши, оғир атлетика баҳсларида қатнашадиган спортчилар Осиё ўйинлари пойтахтига етиб келишди. Уларни маҳаллий «Soekarno Hattа» халқаро аэропортида Ўзбекистон Республикасининг Индонезиядаги элчихонаси вакиллари, Миллий олимпия қўмитаси ишчи гуруҳи аъзолари, Жакартада истиқомат қилаётган бир гуруҳ ўзбекистонликлар, шунингдек, ташкилий қўмита томонидан Ўзбекистон спорт делегацияси учун бириктирилган кўнгиллилар кутиб олишди.
Спортчи ва мураббийлар аэропортдан тўғри Кемайоран дахасидаги Олимпия шаҳарчасига йўл олишди. Улар Осиё ўйинлари давомида айнан шу ерда истиқомат қилишади.
Маълумот учун, эртага соат 18:08 да (Тошкент вақти билан 16:08) Жакартадаги «Gelora Bung Karno Stadium"да XVIII Осиё ўйинларининг тантанали очилиш маросими бўлиб ўтади. 19 августдан эса асосий мусобақаларга старт берилади. Ўша куни сузиш, эркин кураш, ушу, ўқ отиш, академик эшкак эшиш, теннис ҳамда қиличбозлик бўйича баҳсларда ўзбекистонлик спортчилар ўз иштирокини бошлайди. Шунингдек, футболчилар Таиланд терма жамоасига қарши гуруҳдаги сўнгги учрашувларини ўтказади.
