2018 йил 17 август куни Ўзбекистон Республикаси Олий Мажлиси Сенати раисининг биринчи ўринбосари С.Сафоевнинг Хусусий хорижий инвестициялар корпорацияси (OPIC) вице-президенти Д. Бохигиэн бошчилигидаги делегация билан учрашуви бўлиб ўтди. Бу ҳақда Ўзбекистон Республикаси Олий Мажлиси Сенатининг матбуот хизмати хабар берди.

Томонлар Ўзбекистон Республикаси президенти Ш. Мирзиёевнинг жорий йил май ойида АҚШга қилган тарихий ташрифи натижасида «Ўзбекистон ва АҚШ: стратегик шериклик янги даврининг бошланиши» деб номланган Қўшма баёнот қабул қилинганини қайд этдилар. Ҳозирги вақтда умумий ҳажми қарийб 5 млрд. долларлик келишувларни бажаришга қаратилган икки томонлама «йўл хариталари» ижро этилмоқда.

Меҳмонларга мамлакатда олиб борилаётган ислоҳотлар, жумладан қулай инвестиция муҳитини яратишга, хорижий инвестицияларни жалб қилишнинг қонунчилик базасини мустаҳкамлаш ва ривожлантиришга доир ишлар, Ўзбекистон Республикаси ҳудудида инвестиция фаолиятини амалга ошираётган хорижий инвесторлар ҳуқуқлари ва манфаатларини ҳимоя қилиш бўйича давлат кафолатлари ва чораларининг қонунчилик асослари тўғрисида батафсил ахборот берилди.

Ўз навбатида, меҳмонлар мамлакатда ўз фаолиятини қайта бошлаган Хусусий хорижий инвестициялар корпорациясининг, АҚШ Ҳукумати ҳузуридаги агентликнинг мақсади Ўзбекистон бозорига маблағлар киритишда америкалик тадбиркорларга кредитлар ва кафолатлар бериш орқали кўмаклашишдан иборат эканлигини таъкидлаб ўтдилар.

Шунингдек, корпорация хусусий ва бошқариладиган инвестиция жамғармаларини ташкил этишни ҳам қўллаб-қувватлайди. Капитал билан қўллаб-қувватлашдан ташқари, OPIC ривожланаётган мамлакатларга бошқарув кўникмалари ва молиявий экспертизадан фойдаланишда ҳам ёрдам кўрсатади. Бу ривожланаётган мамлакатларда иқтисодий тараққиётни кенгайтиришда ҳамда тадбиркорлар учун янги имкониятлар яратишда муҳим омил ҳисобланади.

Суҳбат чоғида корпорация вакиллари мамлакатимизда биринчи навбатда сиёсий ва иқтисодий вазиятнинг барқарорлиги ҳамда инвесторларнинг хавфсизлиги мустаҳкам таъминланаётганлиги туфайли Ўзбекистон бозорига капитал киритиш истиқболли эканлигини таъкидладилар.

Бугунги кунда корпорация активлари 20 млрд. АҚШ долларини ташкил этади. OPIC жаҳоннинг 160 та ривожланаётган мамлакатида фаолият олиб боради ва ахборот технологиялари, соғлиқни сақлаш, таълим, инфратузилма, телекоммуникациялар, молиявий хизматлар, уй-жой бозори ва қишлоқ хўжалиги каби турли соҳаларда бизнесни молиялаштиришда кўмак беради.

Шунингдек OPIC кичик бизнесдан тортиб то ташқи бозорда ипотека кредитини беришгача кредитлашнинг ҳар хил турларига субсидиялар ажратиш учун хорижий мамлакатларнинг молиявий муассасалари билан ҳам ҳамкорлик қилади.