Самарқанд вилоят ҳокими вазифасини бажарувчи Э.Турдимов «Самарқандкимё» акциядорлик жамиятининг фойдаланилмай турган ҳудудларида тадбиркорлик фаолиятини йўлга қўйиш ниятида бўлган Самарқанд шаҳри, Пастдарғом ва Самарқанд туманлари ишбилармонлари билан учрашди. Бу ҳақда «Зарафшон» газетаси сайтида хабар берилди.

Айни пайтда ҳудуддаги 915 гектар майдон тадбиркорликни ривожлантириш учун ажратилган ва бу ерда 277 та тадбиркорлик субъекти жойлаштирилган. Ҳудуднинг 625 гектаридаги бино ва иншоотлардан фойдаланилаётган бўлса, 107 гектари деярли бўш турибди, 84 гектарга яқини эса ноқонуний равишда эгаллаб олинган.

Маълумотларга кўра, бу ерда Самарқанд шаҳри тадбиркорларига тегишли 8 та, Самарқанд туманига 42 та, Пастдарғом туманига 165 та, «Самарқандкимё» акциядорлик жамиятига тааллуқли 47 та объект мавжуд. Ўрганишлар жараёнида уларнинг барчасидан ҳам самарали фойдаланилмаётгани аниқланган.

Вилоят ҳокими ажратилган ер ва бинолардан самарали фойдаланиш, инвестиция киритиш ва иш ўринлари яратиш зарурлигини таъкидлади. Бу иш қўлидан келмайдиган, мажбуриятини бажармайдиган тадбиркордан объект белгиланган тартибда қайтариб олинади ва истиқболли лойиҳага йўналтирилади.

Учрашувда ҳокимлар ва мутасадди идоралар раҳбарларига тадбиркорларнинг лойиҳаларини яна бир бор пухта ўрганиш ва тезроқ амалга ошириш бўйича топшириқлар берилди. Тадбиркорлик субъектлари шу ернинг ўзида кўплаб савол ва муаммоларига мутасаддилардан аниқ жавоб олди.