Самарқанд халқаро аэропортига «Истанбул-Самарқанд» рейси билан учиб келган фуқаро Х.О. яшил йўлак орқали ўтар экан, белгиланган нормалардан ортиқча салкам 60 грамм тилла тақинчоқларни яширинча олиб кирмоқчи бўлгани фош бўлди. Бу ҳақда «Зарафшон» газетаси Самарқанд вилояти божхона бошқармаси матбуот хизматига таяниб хабар берди.
Ушбу шахс мазкур заргарлик буюмларини нотаниш кимсанинг илтимосига биноан, 25 АҚШ доллари эвазига олиб ўтиб бермоқчи бўлган экан.
Шунингдек, айнан шу рейсда келган фуқаро М.Д. ҳам яшил йўлак тартибини бузди. У ҳам гўёки нотаниш кимсанинг «илтимос"ига биноан 64,75 грамм оғирликдаги заргарлик буюмларини божхона назоратидан яширинча олиб кираётганида тўхтатиб қолинди.
Ҳозирда ушбу ҳолатлар юзасидан божхона текширувлари олиб борилмоқда.
Эслатиб ўтамиз, амалдаги тартибларга кўра жисмоний шахслар вазни 65 граммгача бўлган қимматбаҳо металл ва қимматбаҳо тошлардан ясалган заргарлик буюмларини шахсий эхтиёжлари учун божсиз олиб киришлари мумкин.
Жорий йилнинг ўтган даври мобайнида Самарқанд вилояти божхона бошқармаси ходимлари томонидан 2 килограммга яқин заргарлик буюмларининг ноқонуний олиб ўтилишига чек қўйилган.
