Тошкентдаги «Humo Arena» кўп функцияли музкомплекси 2018 йил 30 декабргача фойдаланишга топширилиши режалаштирилган. ҚҲТБТ порталида ушбу спорт иншооти фаолиятини ташкил этишга йўналтирилган президент қарори лойиҳаси муҳокама қилинмоқда. Бу ҳақда Norma.uz хабар бермоқда.

Иншоотдан хоккей, фигурали учиш, кёрлинг, шорт-трекни ривожлантириш учун фойдаланиш режалаштирилмоқда. Буерда баскетбол, волейбол, мини-футбол, бокс, кураш ва ёпиқ биноларда ўтказиладиган бошқа спорт турлари оммалаштирилади. Концертлар, тантаналар ва бошқа маданий-кўнгилочар тадбирларни ўтказиш ҳам режалаштирилган.

Комплексдан фойдаланишни «Wind Rose» МЧЖ зиммасига юклаш мўлжалланмоқда, у комплекс қурилишига буюртма берган эди. Унинг фаолият юритишидан олинган даромадлар, хайрия маблағлари ва қонун ҳужжатлари билан тақиқланмаган бошқа манбалар молиялаштириш манбалари бўлиши мумкин.

Қуйидагилар назарда тутилган «Йўл харитаси"ни ишлаб чиқиш таклиф этилмоқда:

қишки спорт турлари бўйича тегишли федерациялар ҳамда Қишки ва мураккаб техник спорт турлари бўйича республика олий спорт маҳорати мактаби билан биргаликда қишки спорт турларини ривожлантириш ва оммалаштириш, шу жумладан уларнинг эҳтиёжлари учун «Нumо Arena"да зарур тайёргарлик базасини яратиш чора-тадбирлари;

қишки спорт турлари бўйича федерациялар ва спорт клубларини ташкил этиш;

мавжуд экспонатлар ёхуд мамлакатнинг бошқа музейларидаги уларнинг нусхаларини консолидациялаш ва тўплаш йўли билан Комплекс базасида қишки спорт турлари бўйича вақтинчалик экспозицияларни ташкил этиш;

комплекс қурилиши доирасида унинг лозим даражада жиҳозланишини таъминлаш учун барча тадбирларни, шу жумладан халқаро стандартлар бўйича ўтказиш мақсадида савдо, умумий овқатланиш ва кўнгилочар инфратузилмани тайёрлаш, зарур инвентарь, амуниция ва мосламаларни харид қилиш;

етакчи хорижий компаниялар билан биргаликда спорт инвентари, мосламалар ва амуниция ишлаб чиқарилишини ташкил этиш.

Лойиҳа рад этилиши, ўзгартирилиши ёки унга қўшимча киритилиши мумкин.