Ҳукумат қарори билан «Хорижий кинокомпаниялар томонидан Ўзбекистон Республикаси ҳудудида бадиий фильмларни кино ва видеотасвирга олиш тартиби тўғрисида"ги қарорга ўзгартириш ва қўшимчалар киритилди. Бу ҳақда Адлия вазирлигининг телеграмдаги «Ҳуқуқий ахборот» канали орқали хабар берилди.
Ўзгартиришларга кўра хорижий кинокомпаниялар томонидан фильмни ишлаб чиқариш Миллий кинематографияни ривожлантириш жамғармаси ҳисобига амалга оширилган ҳолларда рухсатнома олиш талаб этилмайдиган бўлди.
Рухсатнома олиш учун тақдим этиладиган ҳужжатларни суратга олиш ишлари бошланишидан камида икки ой олдин Агентликка тақдим этиш амалиёти бекор қилинди.
Фильм олиш учун рухсатнома тўлов тўланганлигини тасдиқловчи ҳужжат тақдим этилгандан кейин бир иш кунида берилиши белгиланди (илгари бу муддат уч кун эди).
Рухсатнома берилиш рад этилиши учун асос бўлган сабаблар бартараф этилган тақдирда, ҳужжатларни такроран кўриб чиқиш ўн кунлик муддатдан беш кунга қисқартирилди.
Мазкур рухсатноманинг амал қилишини тўхтатиб туришга олиб келган ҳолатлар бартараф этилган кунда рухсатноманинг амал қилишини тиклаш тизими жорий этилди.
