1 августдан бошлаб Ўзбекистонда кучга кирадиган тартибга кўра, давлат органи қарорига ишониб, кейинчалик унинг ҳақиқий эмас деб топилиши ёки бекор қилинишидан зарар кўрган инвестор давлатдан товон пули олади. Бу ҳақда президентнинг 1 августдаги «Ўзбекистон Республикасида инвестиция муҳитини тубдан яхшилаш чора-тадбирлари тўғрисида"ги фармонида сўз боради.

«Инсофли фаолият юритган инвестор ва тадбиркорлик субъектига давлат органи (мансабдор шахс) томонидан уларга нисбатан қабул қилинган маъмурий ҳужжатнинг қонуний кучига ишониши сабабли келиб чиққан мулкий зарарнинг ўрни қопланади, агарда ушбу ҳужжатнинг қонуний кучига ишониб мол-мулкдан фойдаланган, битим тузган ёки тақдим этилган афзаллик ва устунликлардан бошқача тарзда фойдаланган ҳамда мазкур ҳужжат кейинчалик ҳақиқий эмас деб топилган ёки бекор қилинган бўлса», — дейилади ҳужжатда.

Давлат органи (мансабдор шахс)нинг маъмурий ҳужжатини бекор қилиш ёки ўзгартириш масаласи, агар у инсофли инвестор ва тадбиркорлик субъектининг қонуний манфаатларига дахлдор бўлса, суд тартибида кўриб чиқилади, унинг сақлаб қолиниши жамоат манфаатларига таҳдид солаётган ҳоллар бундан мустасно.

«Бу давлат ваколатли давлат органлари қабул қилаётган маъмурий ҳужжатлар учун жавобгарликни ўз зиммасига олишини англатади, — дея изоҳ берди Адлия вазирлиги бош маслаҳатчиси Жавоҳир Колизода „Ўзбекистон 24“ телеканалининг „Ахборот 24“ дастурига. — Масалан, туман ҳокими инвесторга ер участкасини ажратиш тўғрисида қарор қабул қилди, инвестор эса унга ишониб қурилишни бошлади. Бироқ бир қанча вақтдан кейин маълум бўлдики, ҳокимнинг мазкур қарори ғайриқонуний ҳисобланади ва юқорида турувчи ҳоким уни бекор қилди. Бу ҳолатда инвестор фақат зарарда қолади».

Эндиликда, Адлия вазирлиги эксперти сўзларига кўра, бу каби ҳолатларда инвестор ёки тадбиркорлик субъектига етказилган зарар қоплаб берилади.

Жисмоний ва юридик шахсларга давлат органи (мансабдор шахс)нинг ноқонуний маъмурий ҳужжати қабул қилиниши оқибатида етказилган зарар давлат томонидан, биринчи навбатда, тегишли органларнинг бюджетдан ташқари маблағлари ҳисобидан қопланади, кейинчалик айбдор шахсдан регресс тартибида ундириб олинади.

«Ахборот 24» дастурида қайд этилишича, бундай чоралар маҳаллий даражадаги раҳбарларнинг қарор қабул қилишдаги масъулиятини оширишга хизмат қилади.