Ўзбекистон Марказий банки биринчи ярим йилликда сўм курсини йўллаб-қувватлаш учун 900 млн доллар миқдоридаги валюта интервенциясини амалга оширди. Бу ҳақда МБ 1 августда эълон қилган пул-кредит сиёсати обзорида (PDF) сўз боради.

«Агарда биринчи чоракда Марказий банк валюта интервенцияси ҳажми 600 млн долларни ташкил этган бўлса, иккинчи чоракда интервенция ҳажми 300 млн доллардан иборат бўлди», — дейилади обзорда.

МБ мутахассислари валюта интервенциясидан фойдаланишни мавсумий омиллар, жумладан иккинчи ва учинчи чоракда жисмоний шахслар томонидан юбориладиган пул ўтказмалари ҳажми сезиларли даражада ортиши билан боғламоқда.

Марказий банк маълумотларига кўра, биринчи ярим йилликда пул ўтказмалари ҳажми 2017 йилнинг шу даври билан солиштирилганда 14 фоизга ўсиб, 2,3 млрд долларга етган.

Йил бошидан буён банклар мажбурий захиралари тузилмасида хорижий валюта улуши валюта ва депозитлар муддатидан келиб чиқиб захира қилиб қўйиш меъёрларининг дифференциялашуви ҳисобига 96 фоиздан 46 фоизга пасайган.