Ўзбекистоннинг Сеулдаги элчихонаси Кёнгсанг провинциясида маҳаллий миграция ҳукумати ходимлари томонидан ўзбекистонлик талабанинг калтакланиши билан боғлиқ ҳодисанинг барча жиҳатларини ўрганиш чоралари кўрилмоқда. Маҳаллий ОАВнинг хабар қилишича, ҳодиса 16 июль куни бўлиб ўтган.
ТИВ матбуот хизматининг хабар қилишича, мавжуд ҳолат билан танишиш ва, зарурият туғилганда, консуллик-ҳуқуқий ёрдам кўрсатиш учун Чхонвон шаҳрига (Сеул шаҳридан 400 км узоқликда жойлашган) элчихонанинг консуллик ходими жўнатилди.
Ташқи ишлар вазирлигининг Консуллик-ҳуқуқий департаменти мазкур масала юзасидан Ўзбекистон элчихонаси консуллик бўлимига ҳеч қандай мурожаат келиб тушмаганини хабар қилди.
