Ахборот тизимлари томонидан шакллантириладиган, битимлардаги томонларни идентификациялаш имконини берувчи электрон чеклар, квитанциялар, хабарлар ва бошқа усуллар квитанциялар, талонлар, чипталарга ҳамда товарлар ва хизматларга ҳақ тўланганлигини тасдиқловчи ҳужжатларга тенглаштирилди. Вазирлар Маҳкамасининг 26 июлдаги қарорида бу ҳақда сўз боради.
Адлия вазирлигининг «Ҳуқуқий ахборот» Telegram-каналида маълум қилинишича, эндиликда электрон тижорат орқали сотилган товарларни сотувчига ва етказиб берувчига автомобиль транспортида Ўзбекистон ҳудуди бўйлаб етказиб бериш учун лицензия олиш талаб этилмайди.
Электрон тижорат орқали амалга ошириладиган уч минг АҚШ долларигача бўлган товарлар юк божхона деларациясини расмийлаштирмасдан, почта хизматларини кўрсатиш қоидаларига мувофиқ реализация қилиниши мумкин.
Мазкур ўзгартиришлар қонунчиликка Электрон тижоратни жадал ривожлантириш чора-тадбирлари тўғрисидаги президент қарори ижросини таъминлаш мақсадида киритилди.
