Ягона умумреспублика процессинг маркази «ХТТ» кўп функцияли софтида ишлайдиган Uzcard нинг барча POS-терминалларида «Операцияни бекор қилиш» ва «Якунларни солиштириш» функцияларини ишга туширди. Бу ҳақда Norma.uz хабар берди.
Янги функциялар билан Uzcard, UnionPay ва MasterCard пластик карталари соҳиблари товарни харид кунида қайтарганларида пулни карточкага қайтариб олиш имконига эга бўлдилар. Маблағлар «Операцияни бекор қилиш» функцияси ёрдамида дарҳол қайтарилади. Мажбурий шарти — харидни тасдиқловчи чекнинг мавжудлиги. Пул қайтарилганлиги далилини «Якунларни солиштириш» хизмати ёрдамида текшириш мумкин.
«Операцияни бекор қилиш» функцияси қуйидаги тартибда ишлайди:
Uzcard пластик карталаридан фойдаланилган ўзаро ҳисоб-китобларда — кун охиригача;
UnionPay ва MasterCard карталаридан фойдаланилган ўзаро ҳисоб-китобларда — харид кунида соат 16−00 гача.
Софтни ўрнатиш учун савдо шохобчаси эгаси хизмат кўрсатувчи банкка мурожаат қилиши зарур. Жараён бир неча дақиқа вақт олади.
