Ўзбекистон Бош прокуратураси Игорь Савицкий номидаги Қорақалпоғистон давлат санъат музейида ёнғин сигнализациясининг ишлаб кетгани сабабларини ўрганади. 15 дан 16 июлга ўтар кечаси ўз-ўзидан ишлаб кетган ёнғин сигнализацияси суви Александр Шевченконинг «Челакли аёл» суратига шикаст етказган.
Бош прокуратурадан «Газета.uz"га хабар қилинишича, мазкур ҳолат бўйича музей ходимлари ва мутахассислари иштирокида баённома тузилган. Айни пайтда ёнғин сигнализациясининг ишлаб кетгани сабаблари ўрганилмоқда.
Бундан ташқари, 8 июнь куни музей ходимлари Николай Караханнинг «Тунги намоз» асарини бир залдан иккинчисига олиб ўтаётган вақтда полга тушириб юбориб, реставрация қилинган қисмига шикаст етказган. Картина яна реставрация қилиниб, экспозицион залга қайтарилган.
13 июль куни Жолдасбек Куттимуратовнинг «Амударё» деб номланган ёнғоқ дарахтидан тайёрланган ҳайкали экспозициядан олиб қўйилган. Бунга номаълум ҳашарот аниқлангани сабаб бўлган. Скульптура кимёвий ишловдан сўнг музей фондига қайтарилган. Тез орада у ўз жойига қайтарилади.
Мазкур ҳолат бўйича Нукус прокуратураси тергов тадбирларини олиб бормоқда, комплекс экспертиза (ёнғин-техник ва бадиий) тайинланган.
«Мамлакат маданий ёдгорликларини муҳофаза қилиш соҳасидаги қонунчиликка риоя этиш — прокуратура органларининг алоҳида назорати остида», — деди Бош прокуратура жамоатчилик билан алоқалар ва ҳуқуқий ахборот бўлими бошлиғи Сурайё Раҳмонова.
