Тадбиркорлик фаолияти асосларини ўқитиш республика маркази ва Ўзбекистон-Хитой савдо уюшмаси беш йил муддатга ҳамкорлик тўғрисидаги меморандумни имзолади. Бу ҳақда «Газета.uz"га учинчи иштирокчи — Хусусийлаштирилган корхоналарга кўмаклашиш ва рақобатни ривожлантириш давлат қўмитаси хабар қилди.
Томонлар тадбиркорлик фаолиятига ўқитиш соҳасида Ўзбекистон ва Хитой дўстона алоқаларини мустаҳкамлаш ҳамда Хитой инвестициялари ва технологияларини жалб қилишга келишиб олди.
Жумладан, Ўзбекистон-Хитой савдо уюшмаси Ўзбекистонда тадбиркорлик фаолиятини ривожлантиришда таълимий дастурлар ва тадқиқотларни ташкил этиш учун грантлар жалб қилишда кўмаклашади.
Ҳамкорликдаги анжуман, семинар, форум ва лойиҳаларни амалга ошириш таклиф қилинмоқда. Тадбиркорлик фаолиятига ўқитиш соҳасида ўзбек ва хитой тадбиркорлари тажрибаларини алмашиш йўлга қўйилади.
Марказ тингловчилари ўқиш якунлари бўйича бизнес ташкил этиш ва Ўзбекистон банкларидан имтиёзли кредитларни олиш учун Хитойда ишлаб чиқарилаётган техникалар билан таниша олишлари учун кичик саноат зоналарида Хитой мини-технологиялари кўргазма майдончаларининг доимий фаолият олиб бориши бўйича ҳам ҳамкорлик йўлга қўйилади.
