Ўзбекистон Олий ва ўрта махсус таълим вазирлиги ўзининг Telegram-каналида мамлакат ОТМларида тўлов-контрактлар миқдори оширилганига изоҳ берди.
2018/2019 ўқув йилидан контрактлар миқдори ўртача 18,5 фоиз, таълим йўналишидан келиб чиққан ҳолда эса 12,3 дан 24,7 фоизгача (жадвал) ошди.
Олий таълим вазирлиги олий таълим муассасаларида ўқитиш харажатларининг асосий қисмини, яъни 91 фоизини иш ҳақи ва стипендия тўловлари ташкил этишига эътибор қаратди. Шу муносабат билан тўлов-контракт асосида ўқитиш қиймати республикадаги энг кам иш ҳақи миқдорига боғланди ва унга нисбатан карра баробарида белгиланди.
Амалдаги тўлов-контракт қийматлари 2016/2017 ўқув йили учун белгиланган бўлиб, 2017/2018 ўқув йилида ушбу қийматлар ўзгаришсиз қолдирилди.
Юқоридагиларга асосан янги ўқув йилида тўлов-контракт қиймати миқдорини индексация қилишда, асосий омил сифатида, ўтган ўқув йилларида стипендия ва иш ҳақи миқдорларининг 2016 йил 1 октябрдан 15 фоизга, 2017 йил 1 декабрдан 15 фоизга ошгани, лекин тўлов-контракт миқдорларининг оширилмагани инобатга олинди.
Шу билан бирга, тўлов-контракт миқдорини ўртача 18,5 фоизга оширишда 2018 йил 15 июлдан республикада иш ҳақи ва стипендия миқдорларининг 7 фоизга, 2018 йил 1 сентябрдан олий таълим муассасалари профессор-ўқитувчилари ойлик маошларини ўртача 25 фоизга оширилганлигини қисман қоплаш лозимлиги, акс ҳолда янги ўқув йилининг якунига келиб олий таълим муассасаларининг бюджетдан ташқари маблағлари бўйича тегишли харажатлар учун маблағлар етишмовчилиги келиб чиқиши ҳам ҳисобга олинди.
Бугунги кунда бир нафар талабани ўқитишнинг ўртача харажати 10,5 млн сўмни ташкил этгани ҳолда, тўлов-контракт қиймати миқдори ўртача 8,7 млн сўм этиб белгиланмоқда.
Олий таълим вазирлиги талабаларга, уларнинг давлат гранти ёки тўлов-контракт шакли асосида ўқишидан қатъий назар, ҳар ойда стипендия тўлаб борилишини алоҳида таъкидлаб ўтди. Ҳозирги вақтда стипендиянинг ўртача ойлик миқдори 466 минг сўмни ёки йилига 5,6 млн сўмни ташкил этади ва у ўқитиш қиймати миқдорига тўлиқ киритилади. Бунда тўлов-контракт асосида ўқитиш қийматининг 45−80 фоизини стипендия ташкил этади (талаба «аъло» баҳога ўзлаштирса жами 7,5 млн сўм стипендия олади), яъни талабага ўзи томонидан ўқиш учун тўланган маблағнинг тахминан ярми ёки ундан кўпи ўқув йили давомида ойлик стипендия кўринишида қайтарилади.
Олий ва ўрта махсус таълим вазирлиги талабаларни ва уларнинг ота-оналарини қизиқтирган барча саволларга, шу жумладан ўқиш учун тўлов шакли, талабалар ва уларнинг ота-оналари томонидан таълим олиш учун иш хақидан йўналтириладиган маблағларга қўлланиладиган имтиёз ва енгилликлар қўллаш тартибига тааллуқли, шунингдек таълим кредити ва бошқа саволларга ёзма шаклда ҳамда давлат интерактив хизматлари орқали жавоб беришга тайёрлигини маълум қилди (боғланиш учун рақамлар ва мурожаат шакллари).
