Хорватия пойтахти Загреб шаҳрида 2 июль куни бошланган спорт курашлари бўйича ўсмирлар ўртасидаги жаҳон чемпионатида ўзбекистонлик Жамшид Маъруфов олтин медални қўлга киритди. Бу ҳақда Ўзбекистон жисмоний тарбия ва спорт вазирлиги хабар берди.
55 килограммгача бўлган вазнда баҳсларга киришган Жамшид Маъруфов финалга қадар Исроил (10:0), Арманистон (4:0), Россия (10:0) ва Италия (5:4) вакилларини мағлуб этди. «Олтин» учун кечган беллашувда япониялик Хайято Фужитадан устун келиб (4:3), жаҳон чемпионига айланди.
Бундан ташқари, чемионат давомида Шаҳбоз Комилов (45 кг) америкалик Рассел Ламерани мағлуб этиб, бронза медални қўлга киритди.
Сўнгги бор ўзбекистонлик спортчи 1998 йилги жаҳон чемпионатида олтин медаль қўлга киритганди. Ўшанда Дилшод Мансуров чемпион бўлганди. Ортда қолган 20 йил давомида юртимиздан юнон-рум курашидан ўсмирлар ўртасида, шунингдек, эркин кураш бўйича ёшлар ва катталар ўртасида жаҳон чемпионлари етишиб чиқди.
