Ташқи интернет каналларига уланиш тезлиги секундига 140,034 Гбитга етди. Йил бошида бу кўрсаткич 94,034 Гбит/с эди.
Бу ҳақда Ахборот технологиялари ва коммуникацияларини ривожлантириш вазирлигининг биринчи яримйилликка бағишланган ҳайъат йиғилишида айтиб ўтилди, дея хабар беради вазирлик матбуот хизмати.
Таъкидланганидек, 690 км оптик толали алоқа тармоқлари ётқизилди, мобил операторларнинг 1004 та база станциялари ўрнатилди, уларнинг 483 таси 3G ҳамда 4G LTE технологиясида хизмат кўрсатади. Айни кунда юртимиз бўйлаб 24,5 минг км оптик толали алоқа тармоқлари ўтказилган, жами 21 мингга яқин база станция ўрнатилган.
Биринчи ярим йилликда Mirzo Ulugbek Innovation Center (MUIC) Инновация марказига 176 та компания аъзо бўлди. Уларнинг умумий сони бугунги кунда 319 тага этди. Бу компанияларда жами 2600 нафар ходим меҳнат қилади.
Йил охирига қадар ташқи интернет каналларининг ўтказувчанлигини 8−10 баробар ошириб, секундига 1 Тбит.га етказиш режалаштирилган. Вазирлик халқаро телеҳаусларга уланиш, турли йўналишлар бўйича янги маршрутларни босқичма-босқич ташкил қилишни режалаштирмоқда. Мамлакат бўйлаб 2 минг км.лик оптик толали алоқа тармоқларини тортиш кўзда тутилган.
