Тошкент ҳокими вазифасини бажарувчи Жаҳонгир Ортиқхўжаев бекатлардаги дўконларни ёпишни таклиф қилди. ЎзАнинг хабар қилишича, у ушбу таклифни ёшлар билан учрашувда илгари сурди.
Ёшлар вакилларидан бирининг пойтахтда жойлашган бекатларда ёшлар кутубхонаси, wi-fi ҳудудлари ва бошқа имкониятларга эга кичик ёшлар маркази ташкил этиш лойиҳасини тинглар экан, бекатлар бунинг учун энг мақбул жой эмаслигини айтиб ўтди.
«Бекат транспортлар, автобуслар тўхташи учун. Кўпчилик „дўкон“ қурмоқда натижада машиналар тўхтаб, жамоат транспортлари ҳаракатига халақит қилмоқда. Яқин кунларда бекатларда дўкон бўлмайди. Бекат бекатлигича қолади», — деди Жаҳонгир Ортиқхўжаев.
Шаҳар ҳокимиятининг «Газета.uz"га хабар қилинишича, мазкур масала бўйича якуний қарор пухталик билан ўрганилиб, Тошкент аҳолиси билан муҳокама этилганидан сўнг қабул қилинади.
