Ўзбекистон Олий Мажлиси Сенати пайшанба куни бўлиб ўтган 15-ялпи йиғилишида «Жамоат жойларида чилим ва сигарет чекишни чеклаш тўғрисида"ги қонунни маъқуллади, дея хабар қилди «Газета.uz» мухбири.
«Миллик тикланиш» Демократик партияси фракцияси депутатлар гуруҳи ташаббуси бўйича муҳокамага киритилган қонун фуқаролар саломатлигини чилим ва сигарет чекишнинг зарарли таъсирларидан ҳамда улар билан боғлиқ ижтимоий ва бошқа оқибатлардан ҳимоялаш, шунингдек ёшлар ўртасида соғлом турмуш тарзини тарғиб қилишга қаратилган.
Ҳужжат чекишга нисбатан қўйилган тақиқларга қўшимча равишда чекишга қарши кураш муҳитини шакллантириш ва тасдиқлашнинг ташкилий ва ҳуқуқий асосларини яратади, дея қайд этишди сенаторлар.
Қонунда «чилим», «чилим учун тамакисиз чекиш аралашмаси», «электрон сигарет» каби тушунчаларга аниқлик киритилган ҳамда чилим ва электрон сигарет чекиш мумкин бўлмаган жамоат жойлари рўйхати аниқлаштирилган.
Кутубхоналар, истироҳат боғлари, ер ости ўтиш жойлари, бекатлар, клублар, ресторанлар, кафе ва бошқалар жамоат жойлари ҳисобланади. Тадбиркорлар — муассасалар хўжайинлари қонун эълон қилинган вақтдан уч ой муддат ичида қонун талабларини бажаришлари лозим.
Қонунда чилим ва электрон сигарет рекламасини чеклаш ва уни чекишни тарғиб қилишни тақиқлаш меъёрлари ўрин олиб, жамоат жойларида чилим ва электрон сигаретларни чекишни чеклаш бўйича чораларни амалга ошириш бўйича мутасадди тузилмалар ва уларнинг мажбуриятларини белгилаб беради ҳамда жамоат жойларида чилим ва электрон сигарет чекиш учун хона ҳамда бинолар ажратилишини, чилим ва чекиш аралашмаларидан фойдаланиш учун жамоат жойларини тақдим этишни тақиқлайди.
Сенаторлар саволларига жавоб берар экан, Вазирлар Маҳкамаси департамент мудири Фанил Қодиров қонун лойиҳасини ишлаб чиқишда халқаро тажриба, жумладан жамоат жойларида чилим чекиш тақиқланган Евроиттифоқ, Россия ва Япония тажрибаси ўрганилганини маълум қилди. Канада, БАА, Австралия ва Таиландда электрон сигаретлар учун буюмларни олиб кириш ва тарқатишни тақиқлаш бўйича янада қаттиқроқ чоралар кўрилган.
Ўзбекистонда 2012 йил апрелдаги қонун билан жамоат жойларида тамаки маҳсулотларини чекиш тақиқланган бўлса ҳам, бунинг учун жарима 2015 йил сўнгига келибгина жорий этилди. Аксарият кўпчилик томонидан мазкур қонун талабларига риоя этилаётгани йўқ.
