Экология ва атроф-муҳитни муҳофаза қилиш давлат қўмитаси сайтида дарахт ва буталарни кесишга берилган хулосалар рўйхати иш бошлади.
Рўйхат сайтнинг Xulosalar ro`yxati — Daraxt va butalarni kesishga бўлимида эълон қилиниб, ҳозирча фақат Тошкент ва Тошкент вилояти ҳудудини қамраб олган.
Рўйхатда хулоса рақами ва санаси, юридик ёки жисмоний шахс исм-шарифи, кўчаси, баённоманинг қисқача мазмуни, дарахтлар сони ва тури, қабул қилинган қарор ва тўлов тури ўрин олган. Рўйхатда 2018 йил 4 июнь ҳолатида 216 та рухсатнома берилган.
Баённомага кўра, Тошкент вилоятининг Зангиота туманида Миллий гвардия ҳарбий-техника институти ҳудудида қурилиш ва реконструкция ишлари муносабати билан 47 туп соғлом (тўлов миқдори — 44,7 млн сўм) ва 170 туп қуриган дарахт (бепул) кесилишига рухсат берилган.
Давлат экология қўмитасидан «Газета.uz"га хабар қилинишича, рўйхат июн охирига қадар тўлақонли ишга туширилиши лозим.
Аввалроқ январдан апрелгача давлат экология қўмитасига жисмоний шахслардан дарахтларнинг ноқонуний кесилиши ҳақидаги қарийб 580 мурожаат келиб тушгани хабар қилинган эди. 2000 дан ортиқ ҳуқуқбузарлик аниқланган бўлиб, ўсимлик дунёсига етказилган зарар миқдори 1 млрд сўмдан зиёдроқни ташкил этади.
