Европа инвестиция банки (ЕИБ) октябрь ойидаёқ Ўзбекистонга 400 млн еврогача миқдордаги илк кредитларини тақдим этиши мумкин. Бу ҳақда Тошкентда бўлиб турган ЕИБ вице-президенти Васил Худак журналистларга маълум қилди.

ЕИБнинг илк кредитлари энергияни тежаш, сув ресурсларини бошқариш, инфратузилмаларни ривожлантириш, иссиқлик таъминоти, темир йўллар қурилиши ва автомобильсозлик учун йўналтирилиши режалаштирилмоқда.

Жумладан, банк Жиззах вилоятида микроавтобуслар ва тижорат автомобилларини ишлаб чиқариш бўйича Uzbekistan Peugeot Citroen Automotive қўшма корхонасига 60 млн евро тақдим этишни режалаштирмоқда.

Васил Худакнинг сўзларига кўра, Ўзбекистон президентининг кузда Брюсселга амалга ошириш режалаштирилаётган ташрифи вақтида кредит шартномаларининг имзоланиши кутилмоқда.

Эслатиб ўтамиз, 2017 йил октябрида Ўзбекистон ҳукумати ва ЕИБ республикада молия муассасаси фаолиятини бошлашни кўзда тутган ҳамкорлик тўғрисидаги шартномани имзолаган эди.