Ўзбекистон президенти Шавкат Мирзиёев Кубанинг Давлат Кенгаши ва Вазирлар Кенгаши аиси Мигел Марио Диас-Канел Бермудесга Кубада йўловчи самолётининг ҳалокати оқибатида кўплаб инсонлар қурбон бўлганлиги муносабати билан мактуб йўллади, дея хабар қилди ТИВ матбуот хизмати.
«Куба халқи учун ушбу қайғули кунда самимий таъзиямни қабул қилишни ва ҳалок бўлганларнинг оила аъзолари ҳамда яқинларига ҳамдарлик ва далда сўзларини, шунингдек, жароҳатланганларга тезда соғайишлари тилагини етказишни сўрайман», — дейилади давлат раҳбари мактубида.
Жума куни Гавана яқинида бортида 110 киши, жумладан экипаж аъзолари бўлган Boeing йўловчи самолёти ҳалокатга учради. Ҳалокатдан уч киши тирик қолди, бироқ улардан бири кейинроқ вафот этган бўлса, яна бири шифохонага олиб бориш йўлида ҳаётдан кўз юмган. Фақат бир аёлгина кўп сонли жароҳатлар билан шифохонага ётқизилган.
Мамлакатда мотам эълон қилинди.
