«Ўзбекистон ҳаво йўллари» Миллий авиакомпанияси авиапарки учинчи Boeing 787 Dreamliner билан тўлдирилди, дея хабар қилди МАК матбуот хизмати. Самолёт жума куни президент Шавкат Мирзиёев АҚШга ташрифидан қайтган 1-рақамли борт билан бирган Вашингтондан етиб келди.

Фото: twitter.com/PamelaSpratlen.

Ҳаво лайнерини Ўзбекистонга Миллий авиакомпания экипажи: МАК Учув-услубий бўлими бош учувчи-йўриқчиси Иосиф Зак, Boeing -787 Учувчилар отряди комадир ўринбосари Шаҳзод Икромов ҳамда иккинчи учувчи Олимжон Узоқов олиб келишди.

Янги лайнер аввалги икки Boeing 787−8 Dreamliner самолётидан йўловчилар учун ўриндиқлар сонининг 270 тага ортгани (бизнес-класс — 24, эконом-класс — 246) ва экипаж дам олиши учун махсус бўлма билан фарқ қилади.

Фото: МАК

Янги лайнерда ҳам авиакомпаниянинг бошқа Boeing-787 ҳаво кемаларидаги каби ёнилғи тежаш самарадорлигини ошириш, шовқин даражасини пасайтириш ва атмосферага CО2 ажраб чиқишини камайтириш имконини берувчи GE Aviation компаниясининг GEnx-1 В двигателлари ўрнатилган.

Янги «Орзу лайнери» авиакомпания парвозлар жадвалига киритилган бўлиб, у узоқ йўналишларда парвозларни амалга оширади.

«Ўзбекистон ҳаво йўллари» Марказий Осиёда Boeing-787 Dreamliner самолётларига буюртма берган биринчи буюртмачидир. 2017 йил 27 июлда Ўзбекистон миллий авиаташувчиси тарихда биринчи марта «Орзу лайнери"да Тошкентдан Нью-Йоркка илк узлуксиз парвозини амалга оширди.

Тўртта янги Boeing-787 Dreamliner авиалайнерини сотиб олиш тўғрисидаги келишувга корпорация президенти Рэймонд Коннернинг 2016 йил сентябрда Ўзбекистонга ташрифи вақтида эришилган, шартнома эса 2017 йил январида имзоланган эди. Янги «Орзу лайнерлари"нинг 2019−2020 йилларда етказиб берилиши режалаштирилган.