АҚШ президент Дональд Трамп Ўзбекистон президенти Шавкат Мирзиёевнинг АҚШга расмий ташрифи муносабати билан ўтказилган қабул маросими иштирокчиларига мурожаат йўллади, дея хабар қилди давлат раҳбари матбуот хизмати.
Унда Америка раҳбари Ўзбекистон раҳбарига Оқ уйга амалга оширган тарихий ташрифи учун миннатдорлик билдирилган.
«Марказий Осиёда мураккаб масалалар ва ҳамкорлик бўйича янги имкониятлар пайдо бўлаётган бир пайтда мулоқотимиз стратегик шериклигимизни янгилашга ёрдам берди», — деб ёзади Дональд Трамп.
У Американинг минтақадаги таъминот йўлларини қўллаб-қувватлаш учун Шавкат Мирзиёев томонидан амалга оширилаётган саъй-ҳаракатлар ва Афғонистон билан алоқаларни яхшилашга қаратилган иқтисодий лойиҳаларни сармоялашга бўлган сафарбарлиги учун у раҳбарлик қилаётган мамлакатга ҳурмат изҳор қилди.
«Президент Мирзиёев мени ишонтириб таъкидладики, Ўзбекистонда катта мақсадларни кўзловчи ислоҳотлар дастури бардавом ва муқаррардир. Мен аминманки, Президентнинг инсон ҳуқуқларини ҳимоя қилишга қаратаётган эътибори унинг халқи ҳаётини янада улкан фаровонлик ва барқарорликка етаклайди. Биргаликда биз Ўзбекистонда ҳисобдорлик ва шаффофлик масалаларини янада яхшилай оламиз. Бу эса Америка компанияларининг фаолияти учун замин ҳозирлаб, мамлакатларимиздаги бандликни оширишга ёрдам беради», — дейилади мурожаатда.
Дональд Трамп ва унинг турмуш ўртоғи Мелания Трамп Шавкат Мирзиёев ва биринчи хоним Зироат Мирзиёевага Америка Қўшма Штатларига қилган унутилмас ташрифлари учун чин дилдан миннатдорчилик билдирди.
«Биламан, бу янгиланган ҳамкорлигимиз икки мамлакат олдидаги янада ёрқин келажакнинг бошланиши холос», — дея мурожаатини якунлайди АҚШ президенти.
