Халқ таълими вазирлиги ўқувчиларнинг ўзлаштириш даражасини белгилаш ва бунда салбий таъсир кўрсатувчи омилларни аниқлаш мақсадида умуммиллий тадқиқот ўтказмоқда, дея хабар қилди ХТВ матбуот хизмати «Газета.uz"га.

Умуммиллий тадқиқот биринчи марта ЮНИСЕФ билан ҳамкорликда ўтказилмоқда. Унинг мақсади
умумий ўрта таълим мактаби ўқувчиларининг билимини халқаро талабларга етказиш, унга мослигини ўрганиб бориш, халқаро амалиётда фойдаланиб келинаётган PISA (Programme for international Student Assessment), TIMSS (Trends in Mathematics and Science Study) каби дастурларга босқичма-босқич интеграциялашдан иборат.

Тадқиқот ишлари жорий йилнинг май ойи давомида республика миқёсида танлаб олинган 255 та мактабда ўтказилиб, унда умумтаълим мактаблари 4-синф ўқувчиларининг математика, ўқиш ва табиатшунослик фанларидан ютуқлари тажриба-синов тариқасида ўрганилади.
Умуммиллий тадқиқот материаллари ЮНИСЕФнинг Ўзбекистондаги ваколатхонаси билан ҳамкорликда амалдаги ДТС ва халқаро тажриба асосида тайёрланган.

Жорий йилнинг 10 июнига қадар умуммиллий тадқиқот натижалари таҳлил қилинади ҳамда олинган хулосалар асосида янги ўқув йилидан ўқувчиларнинг ўзлаштириш даражасини ошириш ва унга салбий таъсир кўрсатувчи омилларни бартараф этиш бўйича тегишли чоралар кўрилади, дейилади вазирлик хабарида.