Ўзбекистонлик боксчи Баҳодир Жалолов якшанба куни АҚШнинг Машантакете шаҳрида профессионал рингдаги илк жангини муваффақиятли якунлади.

Сурхондарё вилоятининг Сариосиё туманидан бўлган оғир вазнли боксчи мексикалик Уго Трухильога (4−1−1, 2 КО) қарши рингга кўтарилди. Ўзбекистонлик учинчи раундда рақибини нокаутга учратди ва ғалаба қозонди.

Баҳодир Жалолов аввал бокс бўйича Ўзбекистон терма жамоаси таркибида иштирок этган. У 2016 йилги Олимпия ўйинлари чорак финалига чиққан, 2015 йилги жаҳон чемпионатида бронза медалини қўлга киритди. 2017 йилда эса ҳаваскорлар ўртасида Осиё чемпиони бўлди.

Миллий олимпия қўмитасига берган интервьюда боксчи келгуси ой яна бир жангда иштирок этишни режалаштираётганини маълум қилди. «Рақиб номаълум. Янада узоқроқни айтсам, 2020 йилги Токио Олимпиадасида иштирок этаман. Чунки орзуим бор. Халқим ва давлатим олдида қарзим бор — Олимпиада олтин медалини қўлга киритиш», — деди у.