Ўзбекистон Жиноят кодексининг 159-моддаси 4-қисми бўйича айбланаётган Бобомурод Абдуллаев, Ҳаётхон Насриддинов, Шавкат Оллоёров ва Равшан Салаев иши бўйича ҳукмнинг 7 май куни ўқиб эшиттирилиши кутилмоқда.
Жиноят ишлари бўйича Тошкент шаҳар судида 4 май куни сўнгги иштирокчи Шавкат Оллоёров ўзининг оқланишини сўраб нутқ сўзлади.
У ўз оиласининг, жумладан нафақахўр ота-онаси ва уч нафар вояга етмаган болаларининг ягона боқувчиси эканини таъкидлади.
Шавкат Оллоёров ота-онаси, бизнес ҳамкорлари, дўстлари, маҳалла — «бутун Ўзбекистон қаршисида» тоза виждон билан чиқишни исташини айтиб ўтди.
Бундан аввал судда Бобомурод Абдуллаев, Ҳаётхон Насриддинов ва Равшан Салаев, шунингдек судланувчиларнинг адвокатлари сўзга чиқди. Прокурор Абдуллаев учун беш йил муддатга қамоқ жазоси тайинланишини, жиноий ишнинг қолган иштирокчилари учун эса оқлов эълон қилинишини сўради.
