Хитой Ўзбекистондан импорт қилинаётган қишлоқ хўжалик маҳсулотлари ассортиментини 2 тадан 12 тагача кўпайтириши мумкин, дея хабар қилди «Ўздавкарантин» инспекцияси «Газета.uz"га.

Ҳозирда Ўзбекистон ХХРга икки номдаги қишлоқ хўжалиги маҳсулоти — гилос ва мош етказиб бермоқда. 26−30 апрель кунлари ХХР карантин хизмати билан бўлиб ўтган музокараларда Хитой томони қовун, узум, анор, ўрик, нектарин, олхўри, хурмо, анжир, лимон ва ерёнғоқ импортини бошлашга тайёрлигини маълум қилди.

Томонлар ҳамкорликдаги лаборатория ташкил этиш ҳамда ўзбек экспортчилари учун «яшил йўлак» очиб бериш масалаларини муҳокама қилишди.

Хитой делегацияси карантин хизматлари ўртасидаги келишув ва бошқа ҳужжатларни имзолашни кўриб чиқишга тайёр эканини билдирди.