Бухоро вилоятида «Ғузор-Бухоро-Нукус-Бейнеу» автойўлининг 355−440- километрини реконструкция қилиш ишлари якунига етди, дея хабар қилди Ўзбекистон Автомобиль йўллари давлат қўмитаси матбуот хизмати «Газета.uz"га. янги йўл қопламаси бу ердан ўтиш вақтини қарийб уч баробарга қисқартирди.
Йўлнинг аввалги ҳолати.
Реконструкция қилинган йўл участкаси — «Европа-Осиё» трансконтинентал автомагистрали участкаси ҳисобланган «Бейнеу-Қўнғирот-Бухоро-Самарқанд-Тошкент-Андижон» йўналиши бўйича халқаро транспорт йўлаги қисми ҳисобланади. У Е-40 Европа транспорт йўналишининг ҳам бир бўлаги ҳисобланади. У орқали Марказий ва Шарқий Европа, Россия, Украина ва Қозоғистонга чиқиш таъминланади.
Янги йўл цементбетон қопламага эга бўлиб, 120 км/соатгача тезликда ҳаракатланишга мўлжалланган. Ҳар бир йўналиш икки қатордан иборат бўлиб, ҳаракатланиш қисмининг кенглиги — 2×7,5 м га тенг.
Мазкур лойиҳанинг умумий қиймати 175,2 млн АҚШ долларини ташкил этиб, ушбу ишларни амалга ошириш учун бош пудратчи ташкилот этиб Корея Республикасининг POSCO Engineering & Construction Co. Ltd. компанияси белгиланган.
Ушбу ишларни бажаришда 400 донадан ортиқ йўл қурилиш техникалари жалб қилинди. Қурилиш давомида 600 нафарга яқин маҳаллий мутахассислар ва ишчилар тун-у кун меҳнат қилишди.
Экологик ҳолат ҳам яхшиланган. Йўлларни қум тўсиб қолишининг олди олиниб, йўл ёқалари бўйлаб саксовул ўрмонлари барпо этилди.
Қўмита матбуот хизматининг хабар қилишича, ушбу йўлнинг фойдаланишга топширилиши — ички ва ташқи савдонинг ошишига ўз ҳиссасини қўшади, шунингдек, қўшни давлатлар билан иқтисодий алоқаларни таъминлашда муҳим бўғин бўлиб хизмат қилади.
