Арманистон бош вазири Серж Саргсян душанба куни бутун мамлакатда ўн кундан буён давом этаётган норозилик намойишлари манзарасида истеъфога чиқди. РИА Новостининг хабар қилишича, Серж Саргсян ўзининг махсус мурожаатида мураккаб вазиятдан чиқишда бир қанча ечимлар бўлишига қарамасдан, ягона чиқиш йўли — истеъфо беришни танлаган.
Бир оз муддат ўтгач, Арманистон президенти Армен Саркисян ҳукумат истеъфосини қабул қилиб олди. Мамлакат конституциясига кўра, бош вазир ортидан ҳукумат ҳам истеъфога чиқади.
Бош вазирнинг биринчи ўринбосари Карен Карапетян вақтинча бош вазир вазифасини бажарадиган бўлди.
Карен Карапетян.
Серж Саргсян 2008 ва 2013 йилларда икки марта президент лавозимига сайланган. Норозилик намойишлари 13 апрель куни унинг Арманистон бош вазири лавозимига сайланганидан сўнг бошланди. Мухолифат Саргсянни самарасиз бошқарув ва мамлакатда иқтисодий вазиятнинг ёмонлашувида айблади. 17 апрель куни мухолифат «бахмал инқилоб» бошланганини эълон қилди.
Намойишларга қарамасдан Арманистон парламенти худди шу куни Саргсянни Вазирлар Маҳкамаси раҳбари этиб сайлади. Ундан аввалроқ эса мамлакат конституциясига киритилган бош вазирга кўплаб ваколатларни берувчи ўзгартишлар кучга кирди.
Мухолифа етакчиси Никол Пашинян Ереван марказида ўтказилган намойишда яқин ҳафталарда янги бош вазир тайинланиши лозимлигини маълум қилди. «Шундан сўнг вақтинчалик ҳукумат шакллантирилади, кейин эса навбатдан ташқари парламент сайловлари бўлиб ўтади», — дея қўшимча қилди у.
