Франциянинг авиакосмик, ҳарбий ва денгиз саноати учун ахборот тизимларини ишлаб чиқарувчи Thales International компанияси сунъий йўлдош ва сунъий йўлдош ускуналарини ишлаб чиқариш соҳасида Ўзбекистон билан ҳамкорлик қилишни мўлжалламоқда. Бу ҳақда «Ўзбекистон 24» телеканалининг «Таҳлилнома» дастурида хабар қилинди.

Комплекс космик тизимлар, жумладан турли мақсадларга мўлжалланган сунъий йўлдошларни учириш ва бошқариш бўйича лойиҳаларни амалга ошириш режалаштирилмоқда.

Ўзбекистон ҳудудида маҳаллий мутахассисларни ўқитиш учун Thales International технологик базаси ташкил этилиши мумкин.

Бундан ташқари, компания Ўзбекистонга космик технологиялардан фойдаланган ҳолда юқори тезликдаги интернет тармоғига уланиш учун инфратузилмаларни ривожлантириш бўйича қўшма лойиҳани амалга оширишни таклиф қилди.

Февралда президент Шавкат Мирзиёев Ўзбекистонда космик тадқиқотлар ва технологияларни ривожлантириш бўйича чора-тадбирлар тўғрисидаги фармойишни имзолаган эди. Унда мамлакатда космик ва сунъий йўлдош технологияларини жорий этиш концепциясини ишлаб чиқиш топширилган.

Йил бошида эса Шавкат Мирзиёев интернетга уланиш нархларини кескин арзонлаштириб, унинг тезлигини шу йилнинг охиригача энг камида тўрт баробарга ошириш, 2020 йилгача тезликни МДҲ давлатлари даражасига етказишни топширди.

Франциянинг Oberthur ва Thales компаниялари биометрик назорат асосидаги паспорт-виза ҳужжатлари тизимини яратишда иштирок этган.