Тошкентда 16 апрелдан бошлаб кадастр йиғмажилди ва эгалик ҳуқуқини тасдиқловчи ҳужжат ўрнига кадастр паспортини бериш бошланади. Бу ҳақда пойтахт Ер ресурслари ва давлат кадастри бошқармаси сайтида хабар қилинди.
Жорий этилаётган ушбу янгилик кадастр ҳужжатларини тайёрлашда жараёнларни соддалаштириш ва муддатларни қисқартириш, шунингдек квартира билан боғлиқ операцияларда эгалик қилувчилар учун қулайлик яратишга қаратилган.
Кадастр паспортида квартиранинг техник параметрлари, кадастр қиймати, квартира режаси, эгалик ва квартирага бўлган ҳуқуқнинг давлат рўйхатидан ўтгани ҳақидаги маълумот ўрин олади.
Паспортда онлайн режимда ҳужжат мақомини, унинг ҳақиқийлиги, квартирага нисбатан тақиқлар мавжуд эмаслиги ва бошқа маълумотларни текшириш мумкин.
Ҳужжатнинг янги намунаси квартираларнинг янги эгалари ёки эски кадастр ҳужжатларини йўқотган квартира эгасининг аризаси асосида берилади. Аввал берилган кадастр ҳужжатларини янгилаш талаб қилинмайди ва улар квартира эгасининг унга бўлган ҳуқуқи бекор қилинмагунга қадар ҳақиқий ҳисобланади.
Бошқармадан аниқлик киритилишича, янги тизим 1 июнга қадар синовдан ўтказилиб, унинг натижалари бўйича индивидуал турар жойлар ва нотурар объектлар учун худди шундай соддалаштирилган паспорт тайёрланиши лозим.
