Тошкент ва Олмаота ўртасида 12 апрелдан автобус қатнови йўлга қўйилади, дея хабар қилди «Ўзавтотранс» агентлиги.

«Тошкент-Олмаота» халқаро автобус йўналишида доимий қатновлар кунига уч марта (16:00, 17:00 ва 18:00 да) «Тошкент» автовокзалидан амалга оширилади. «Олмаота-Тошкент» йўналиши бўйича автобуслар эса «Сайран» автовокзалидан йўлга отланади.

«Ўзавтотранс» Қозоғистон Инвестициялар ва ривожлантириш вазирлиги Транспорт қўмитаси билан биргаликда йўналишни очиш бўйича тайёргарлик ишларини олиб борди. 11 апрель куни синов қатнови амалга оширилади.

Йўналиш масофаси 818 км ни, йўлга сарфланадиган вақт эса 16 соату 30 дақиқани ташкил этади. Жадвалга «Ғишткўприк» (Ўзбекистон) ва «Жибек Жоли» (Қозоғистон) постларида божхона ва чегара назоратидан ўтиш учун 30 дақиқадан вақт киритилган.

Йўналиш бўйича йўл ҳақи 100 минг сўм ва 4000 тенге этиб белгиланди. Ўзбекистон YUTONG (Хитой), Қозоғистон эса VANHOL (Бельгия) русумли автобуслардан фойдаланади.

Йўналишга хизмат қилиш учун ўзбек томонидан ERKIN EMINA EXPRESS TOUR ташувчи этиб белгиланган бўлса, қозоқ томони «ЮГ ТРАНС ЛАЙН» билан Қозоғистон ҳудудида автобусларга хизмат кўрсатиш (автобусларнинг техник кўриги, ҳайдовчиларни тиббий кўрикдан ўтказиш, қўриқлаш ва автобусларни ювиш) бўйича ўзаро ҳамкорлик тўғрисида шартнома имзолади.

Томонларнинг божхона ва чегара хизматлари «Тошкент-Олмаота-Тошкент» йўналиши автобуслари ва йўловчиларининг чегарани кесиб ўтишдаги чегара ва божхона жараёнларини устувор тартибда ўтказиш билан боғлиқ масалаларни ҳал этишди.