Республика шошилинч тиббий ёрдам илмий марказида буйрак кўчириб ўтказиш операцияси ўзлаштирилди. Операцияни ўтказиш бепул бўлиб, харажатлар давлат ҳисобидан қопланади, дея хабар берди Ўзбекистон Соғлиқни сақлаш вазирлиги матбуот хизмати «Газета.uz"га.

6 апрель куни РШТЁИМда Туркиянинг Башкент тиббиёт университети билан ҳамкорликда янгийўллик 14 ёшли бемор Умиджон Абдумаджидовга 35 ёшли отаси Илғор Абдуқаюмов донорлигида буйрак кўчириб ўтказиш операцияси бажарилди.

«Трансплантация жарроҳлиги — замонавий тиббиётнинг истиқболли йўналишларидан бири. Бундай юқори технологик операциялар АҚШ, Россия, Германия, Норвегия, Швейцария, Туркия каби тиббиёти ривожланган давлатлардагина бажариларди, холос, — дейди Соғлиқни сақлаш вазири ўринбосари, РШТЁИМ бош директори Абдуҳаким Хаджибаев».

Амалиёт Башкент тиббиёт университети ректори, Жаҳон трансплантологлари жамияти президенти Меҳмет Хаберал билан ҳамкорликда ўтказилди. Операция жараёнида туркиялик ва ўзбекистонлик мутахассислар ўз маҳоратларини кўрсатишди.

Меҳмет Хаберал Туркия ва Европанинг бир қатор давлатларида трансплантология йўналишига асос солган профессордир. Меҳмет Хаберал буйрак кўчириб ўтказиш бўйча 1832 та, жигар кўчириб ўтказиш бўйича 344 та операцияга бевосита раҳбарлик қилган. Башкент тиббиёт университетида жигар ва буйрак трансплантациясидан ташқари, суяк кўмиги, юрак трансплантацияси ҳам ўтказиб келинмоқда.

«Бемор Умиджон Абдумажидов сурункали буйрак етишмовчилигининг терминал босқичида эди. Буйрак ўз ишини тўлиқ бажара олмаётгани боис, қони гамодиализ аппарати орқали тозаланиб келган. Амалиёт яхши ўтди, деёламан. Ҳозиргача бўлган натижаларнинг барчаси ижобий. Тез кунларда бемор ва донор соғлом ҳаётга қайтади. Энг муҳими, энди марказ мутахассислари бу каби операцияларни бемалол бажара олади», — деди Меҳмет Хаберал.

Ўтган йилдан эътиборан Академик В.Воҳидов номидаги Республика ихтисослаштирилган хирургия илмий-амалий тиббиёт марказида буйрак кўчириб ўтказиш бўйича операциялар муваффақиятли бажариб келинаётган бўлса, жорий йилдан ушбу марказда мамлакат тиббиёти тарихида биринчи марта жигарни кўчириб ўтказиш операцияси юқори натижа билан ўтказилди.

Академик В.Воҳидов номидаги Республика ихтисослаштирилган хирургия илмий-амалий тиббиёт марказида буйрак кўчириб ўтказиш операциялари кундалик амалиётлар қаторидан жой олган. Ўтган қисқа вақт ичида қирқ нафардан ортиқ беморга унинг яқинларидан буйрак кўчириб ўтказилди. Яқинда буйрак етишмовчилиги билан бирга, қандли диабет хасталигидан ҳам азият чекаётган беморда худди шундай амалиёт бажарилди.

Шундай мураккаб амалиётлардан яна бири Республика Гематология ва қон қуйиш илмий текшириш институтида ҳам ўтказиб келинмоқда. Институт олимлари жаҳон тиббиётининг илғор йўналиши — ўзак ҳужайра трансплантациясини ўзлаштириб, ҳозирда уни муваффақиятли йўлга қўйди.