Барча Роналдунинг голидан ҳали-ҳамон ўзига келмай турган бир пайтда бизни бу тун икки муросасиз баҳс кутиб турибди: Камп-Ноу стадионида каталонияликларнинг Рим гарнизони билан жанги кечса, Энфилдда ҳақиқий инглизча рок-н-ролл баттл бўлиб ўтади.
Барселона (Барселона, Испания) — Рома (Рим, Италия) | «Камп-Ноу» стадиони, Барселона | 23:45 — UzReport каналида
«Mes que un club"га ортиқча таъриф беришга ҳожат йўқ. Гуруҳдан ортиқча қийинчиликсиз чиққан кўк-анор ранглилар йўлида учраган рақибни тор-мор келтира олишини Европанинг барча клублари жуда яхши билади. Барселона Ла-лига ва Еврокубоклардаги сўнгги 17 ўйиндан буён мағлуб бўлмай келаяпти.
Статистика бўйича ўзаро 4 ўйинда томонлар муроса кўчасини танлашган: биттадан ғалаба ва икки бор дуранг, бироқ сўнгги марта ЕЧЛ доирасида бундан икки йил муқаддам Барселона ўз уйида Романи 6−1 ҳисобида мағлуб этган. Рома эса узоқ 2002-йилда «Олимпико"да ҳеч қандай имкон қолдирмаган: 3−0.
Бош мураббий Эрнесто Вальверде рақиб жамоанинг гуруҳдаги ўрта даражали жамоалар ва плей-оффда Донецкнинг Шахтёри тўсиғидан машаққат билан ўтиб келганига эҳтиёткорлик билан қарамоқда: «Рома футболчилари ҳимояда анча иншончли ўйин намойиш қиладилар ва ҳужумда ҳам яхши имкониятга эгалар. Бу ЕЧЛ чорак финали, бу ерда осон бўлмайди. Менга бизнинг биринчи ўйиндаёқ ҳаммасини ҳал қилиб қўйишимиз мумкинлиги ҳақида гапиришаётгани ёқмаяпти. Мен умид қиламанки, мухлисларимиз бизни Челси билан ўйинда бўлгани каби қўллаб-қувватлаб турадилар».
Фото: standard.co.uk
Барселона Челсини осонликча мағлуб эта олгани йўқ. Ла-Лигада Севилья билан ўтган ўйинда ҳам Лионель Мессисиз каталоняликларнинг ҳоли танг эди. Рома бош мураббийи Эусебио Де Франческо Барселонадек жамоага қарши қандай ўйнашни яхши билади: итальян футболи анъаналарига хос қамал услубида ҳужум учун очиқ жой қолдирилмаса бас — Олимпико стадионида, ўз уйингда мозий деворлари-да ёрдам беради. «Бўрилар» Камп-Ноудан талафотсиз чиқиб кета олишса бас. Центурион сафларида Ража Наинголаннинг майдонга тушиши гумон остида бўлса, Стефан Эл-Шаарави, Александр Коларов, Эдин Джеко ва Костас Маноласлар ўйинга шай.
Ливерпуль (Ливерпуль, Англия) — Манчестер Сити (Манчестер, Англия) | Энфилд стадиони, Ливерпуль | 23:45 — FutbolTV каналида
You’ll never walk alone. Дарҳақиқат, Ливерпуль жамоаси ЕЧЛда ёлғиз юргани йўқ. Ахир чорак финалдаги рақиб — Манчестер Сити. Ҳар икки жамоанинг таркибида кучли ва иқтидорли футболчилар талайгина. Мураббийларнинг савияси ва тажрибаси бир-бирига муносиб. Кеча ўтган ўйинларда Реал Мадрид яққол устунликда ғалаба қозонган, Бавариянинг Севилья устидан ғалаба қозонишини, бугун эса Барселона-Рома баҳсида ким ғолиб бўлишини сезиларли устунлик билан тахмин қилганлар талайгина.
Бироқ бу жуфтлик жамоаларининг ҳар жиҳатдан кучлари тенг. Бир лигада тўп сурадиган икки инглиз жамоасининг ўйини услуби ҳам бир-бирига ёд бўлиб кетган. Гапнинг индаллосини айтганда, АПЛдаги чемпионлик баҳсидан чиққан Ливерпуль энди омадини Киев томон йўлда синаб кўради. Юрген Клопп қўл остидаги жамоа Энфилдда сўнгги марта шаҳарликларни не кўйга солганини футбол мухлислари яхши билади.
Фото: thesun.co.uk
Пеп Гвардиоланинг УЭФА сайтига берган интервьюсидан маълумки, у шогирдлари бутун мавсум давомида кўрсатиб келган барқарор ўйинини ЕЧЛ чорак финалида ҳам намойиш қилса, кейинги босқич томон илдамлашига ишонади.
Маълумот учун, Ливерпуль ва Манчестер Сити клублари ЕЧЛда бир марта ҳам тўқнаш келишмаган. АПЛдаги устунлик эса қизиллар томонида: 87 ғалаба, 45 мағлубият ва 46 марта икки инглиз клуби муроса йўлидан кетишган.
Ливерпуль томондан Муҳаммад Салоҳ — Фирминьо — Мане учлиги рақиблари эътибори марказида бўлса, Жезус — Кевин Де Брёйне — Стерлинг учлиги Клопп кўзойнаклари қаршисидан кетмаётгани аниқ. Муросасиз ўйинда кимнинг қўли баланд келишини бугун тунда томоша қиламиз.
